स्वक्वःगु जनआन्दोलन असोज २१ लिपाः : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' राष्ट्रपतिया असंवैधानिक पलाः भिंकेगु ज्या मजूसाः असोज २१ लिपाः स्वक्वःगु जनआन्दोलन यायेगु ख्याच्वः बियादीगु दु ।
मंगलवाः पोखराय् पत्रकारत नाप खँल्हाबंला यानादिसें माओवादी अध्यक्षं सदनय् दर्ता या:गु संकल्प प्रस्तावया बारे सहलह नं मयाइगु व संविधान संशोधनया मागय् नं कांग्रेस व एमालें सहमति मप्वंकूसाः असोज २१ लिपाः आन्दोलन यायेगु धयादिल ।
वयेकलं आन्दोलनया स्वरुप हिंसात्मक मजूसें शान्तिपूर्ण जुइगु धयादिसें न्हापांगु चरणया आन्दोलन स्वयां थ्व आन्दोलन पाइगु धयादिल । जनआन्दोलनया अधिकारयात संयुक्त राष्ट्रसंघया बडापत्रय् मान्यता ब्यूगु न्ह्यथंनादिसं अध्यक्ष प्रचण्डं जनआन्दोलन जनविद्रोहया कथं हिलेफइगु खँ नं धयादिल ।
माओवादी अध्यक्ष प्रचण्डं सहमतिया निंतिं कुतः जुयाच्वंगु धयादिसें कांग्रेस, एमाले व माओवादी दथुइ सहमति जुइगु यक्व सम्भावन दुगु धयादिल । वयेकलं माओवादीया मागय् एमाले सहमत जुइधुंकूगु तर कांग्रेसं कयाच्वंगु अडानं सहमति जुइमफुगु द्वपं बियादिल ।
