स्वास्थ्यकर्मीया आन्दोलनया कारणं निम्ह सित
स्वास्थ्यकर्मीतय्सं आकस्मिक सेवा बन्द यायेवं सुनसरीया धरानय् च्वंगु वीपी कोइराला स्वास्थ्य विज्ञान प्रतिष्ठानय् उपचारया अभावय् निम्ह बिरामीत सीगु दु । वासः याकेत भर्ना जुपिं सुनसरी भरौलाया बाबुराम खड्का व सुनसरीया हासपोसाया ईश्वर राई सीगु खः । सिपिनि छेँजःपिंसं उपचारया अभावं ज्यान वंगु खँ धाःगु दु ।
थःपिनिगु सुरक्षाया माग यासें धरान स्थित वीपी कोइराला स्वास्थ्य विज्ञान प्रतिष्ठानया स्वास्थ्यकर्मीतय्सं मंगलवा: सुथय् खुताः ईलं निसें झितात्याः ई तक आकस्मिक सेवा बन्द याकूगु खः । लिपाः आकस्मिक सेवा चाःसां ईलय् हे वासः याके मफया थः छेँया दुजत सीगु द्वपं सिपिनि छेँजःपिंसं ब्यूगु दु ।
मोटरसाइकल दुर्घटना लिपा थः मचायात स्वास्थ्यकर्मीतय्सं बांलाक वासः मयाःगु धासें धरानया रमेश ढकालं सोमवाः बहनी छम्ह स्वास्थ्यकर्मीयात दागु खः । थुकीया हे विरोधय् स्वास्थ्यकर्मीतय्सं मंगलवा: आकस्मिक सेवा बन्द याकूगु खः ।
