कांग्रेस नेतातय्सं माओवादी प्रति आक्रोश प्वंकल
सत्तारुढ नेपाली कांग्रेसया नेतातय्सं प्रमुख प्रतिपक्षी दल एकीकृत नेकपा (माओवादी) प्रति आक्रोश प्वंकूगु दु । नेतातय्सं माओवादीं नागरिक सर्वोच्चताया नांमय् संविधानया उल्लंघन यानाच्वंगु व देशय् असहज परिस्थिति सृजना यानाच्वंगु द्वपं ब्यूगु दु ।
सोमवाः कांग्रेसया संसदीय दलया केन्द्र उल्लेज्या यानादिसें कांग्रेस संसदीय दलया नेता रामचन्द्र पौडेलं माओवादीं थःपिंसं यायेत स्वगु थें 'कू' यायेमफुगुलिं अप्पां क्येकीगु राजनीतिइ कुहांवःगु द्वपं बियादीगु दु । वयेकलं नागरिक सर्वोच्चताया खँ ल्हाइपिं माओवादीं हे नागरिकतय्त असुरक्षित दयेकूगु धयादिसें नागरिकतय् जीवनयात दकलय् असफल दयेकीम्ह माओवादी हे जूगु धयादिल ।
वहे ज्याझ्वलय् न्ववानादिसें कांग्रेस नेता प्रकाशमान सिंहं नागरिक सर्वोच्चताया खँ ल्हाइपिं माओवादीं हे संविधान विपरित ज्या यानाजूगु द्वपं बियादिल । वयेकलं संविधानसभा दुने माओवादीया व्यवहारया कारणं अधिनायकवादी संविधान निर्माण जुइगु खतरा अप्वःगु नं धयादिल ।
अथेहे सोमवाः हे पुलांम्ह प्रधानमन्त्री व कांग्रेसया वरिष्ठ नेता शेरबहादुर देउवां जनसम्पर्क समिति युरोपया प्रतिनिधित नाप थःगु हे छेँ बुढानिलकण्ठय् खँल्हाबंला यानादिसें माओवादीया हे कारणं वर्तमान राजनीतिक संकट वःगु व माओवादीं ईलय् हे बिचाः मयासाः देशय् असहज परिस्थिति सृजना जूगु धयादिल ।
सोमवाः हे स्याङ्जाय् जूगु छगू ज्याझ्वलय् न्ववानादिसें कांग्रेसया उपसभापति गोपालमान श्रेष्ठं माओवादीं मन्त्रीतय् अप्पां क्येकाः लोकतन्त्रया उपहास याःगु द्वपं बियादिल । नापं वयेकलं युद्धकालय् माओवादीं कब्जा याःगु छेँ, बुँ लितबीगु पलेसा राजनीतिक आस्थाया आधारय् विस्थापित यायेगु ज्याय् माओवादी लगेजुयाच्वंगु धयादिल । वयेकलं माओवादीं थंज्याःगु हे पह क्यनाच्वंसाः ईलय् संविधान निर्माण जुइमफइगु धयादिल ।
