शीर्ष नेतातय् बैठक स्थगित
येँ (सन्ध्या टाइम्स)/ राजनीतिक गतिरोध अन्त्य यायेगु निंतिं थौं च्वनेधाःगु स्वंगू दलया शीर्ष नेतातय् बैठक स्थगित जूगु दु ।
नेपाली कांग्रेसया सभापति गिरिजाप्रसाद कोइरालाया निवास महाराजगञ्जय् सभापति कोइराला, माओवादी अध्यक्ष प्रचण्ड व एमालेया अध्यक्ष झलनाथ खनालया दथुइ सहलह यायेगु क्वःछिनातःगु खः ।
निगू पक्षीय वार्ताया आवश्यकता जूगु धासें थौंया बैठक स्थगित याःगु खँ धाःगु दु। कन्हय् निगू पक्षया बैठक च्वनाः जक स्वंगू दलया शीर्ष नेतातय् बैठक क्वःछिउगु खँ सम्बन्धित सूत्रं धाःगु दु ।
वंगु छुं न्हि न्ह्यवंनिसें निगू पक्षीय बैठक लिपा म्हिगः स्वंगू दलया शीर्ष नेतातय् बैठक च्वनेगु सहमति कायम जूगु खः ।
