रामशेखरपाखें स्वम्ह स्रष्टातय् सम्मान
ख्वप (सन्ध्या टाइम्स)/ नेपालभाषाया नांजाःम्ह साहित्यकार रामशेखर नकःमिं सिद्धि स्मृति प्रतिष्ठानय् जूगु छगू ज्याझ्वःया दथुइ भाषाथुवाः रमापतिराज शर्मा, नेपालभाषाया आधुनिक कवि डा. योगेन्द्र प्रधान व गायिका कमला श्रेष्ठयात हनापौ देछासें हन। मूपाहां रामशेखर नकःमिं वय्कःपिंत हनापौ नापं दोसल्ला न्ययेकादीगु खः ।
ज्याझ्वलय् वय्कलं थः भाषा सेवाय् लगे जुयागुलिं दां कमे याये मफुसां सुयागुं न्ह्यःने झुके जुइम्वाःगु हे तःधंगु उपलब्धी खः धयादिल ।
सम्मानित व्यक्तित्व रमापतिराज शर्मां नेपालभाषाया स्वरुप बारे सयेका थुइका च्वनेमाःगु खँ कनादिल ।
मेम्ह सम्मानित व्यक्तित्व डा. योगेन्द्र प्रधानं जागरित मनूतय्सं मेपिंत जागरित यायेत कोरा साहित्य जक मखु सिर्जनात्मक रुपं उकिं न्हू पुस्तायात लँ क्यने कथं च्वयेमाःगु खँ कनादिल ।
तिलकप्रकाश कायस्थ, सन्तोष भुजेल व काशिराम विरसपिंसं सम्मानित व्यक्तित्वतय् म्हसीका न्ह्यब्वयादीगु ज्याझ्वः भक्तपुर साहित्यिक समाजया अध्यक्ष प्रभाकर 'असिम'या सभापतित्वय् जूगु खः ।
