ख्वपय् आधारभूत बौद्ध कक्षाया समापन
ख्वप (सन्ध्या टाइम्स)/ भक्तपुर बौद्ध सम्पदा संघया ग्वसालय् शनिवाः थनया झोरबहीइ जूगु छगू ज्याझ्वलय् प्यला यंकं न्ह्याःगु आधारभूत बौद्ध कक्षाया सहभागी बौद्ध ब्यक्तित्वतय्त दसिपौ लःल्हात ।
न्याम्ह मिस्त व च्याम्ह मिजं नापं झिंस्वम्हेस्यां उगु प्यलाया तालिम पूवंकूगु खः। तालिम पूवंकूपिंत लोटस रिसर्च सेन्टरया प्रमुख प्रा. डा. भद्ररत्न वज्राचार्यं दसि पौ लःल्हानादिल ।
भक्तपुर बौद्ध सम्पदा संघया अध्यक्ष पद्मसुन्दर शाक्यया सभापतित्वय् जूगु ज्याझ्वलय् शिक्षक प्रतिनिधि सुरेन्द्रमान वज्राचार्य, विद्यार्थी प्रतिनिधिपिं रोजीना वज्राचार्य व प्रवीण वज्राचार्यपिंसं न्ववानादीगु खः ।
ज्याझ्वःया संयोजक पुष्परत्न शाक्यं लसकुस यानाः न्ह्याकूगु ज्याझ्वलय् रोशन वज्राचार्यं सुभाय् देछानादीगु खः ।
