न्हापांगु चरणया आन्दोलन सफल : माओवादी
सहमतिया निंतिं कांग्रेस बाधक
एकीकृत नेकपा (माओवादीं) नागरिक सर्वोच्चताया पक्षय् व राष्ट्रपति डा. रामवरण यादवं ल्ह्वंगु पला:या विरोधय् याःगु न्हापांगु चरणया आन्दोलन सफल जूगु निष्कर्ष पिकाःगु दु ।
माओवादी स्थायी समितिया सोमवाः च्वंगु बैठकं थुगु निष्कर्ष पिकासें दलत दथुइ नेपाली कांग्रेसया कारणं सहमति जुइमफुगु द्वपं ब्यूगु दु । बैठकं देयन्यंक क्वचाःगु न्हापांगु चरणया आन्दोलन, जनसभा व प्रशिक्षण भव्यतापूर्वक सफल जुया जनतायात वैचारिक राजनीतिक रुपय् दिशावोध याःगु व नागरिक सर्वोच्चताया नारा जनताय् स्थापित जूगु निष्कर्ष पिकाःगु दु ।
पार्टीया केन्द्रीय ज्याकू पेरिसडाँडाय् च्वंगु बैठकं राजनीतिक गतिरोध अन्त्यया निंतिं कांग्रेस, एमाले लगायत थीथी दलनाप थप वार्ता यायेगु व यदि कांग्रेस व एमाले संविधान संशोधन यायेत नं तयार मजूसाः मेगू चरणया आन्दोलनया घोषणा यायेगु निर्णय याःगु दु ।
बैठकय् कांग्रेस यथास्थितं च्वये वनेमफुगुलिं राजनीतिक गतिरोध अन्त्य जुइत थाकूगु विश्लेषण जूगु व राजनीतिक गतिरोधया अन्त्यया निंतिं एमालें पुनर्विचार यायेमाःगु खँ बः ब्यूगु दु ।
