उच्चस्तरिय संयन्त्र तत्काल निर्माण यायेत सभामुखया इनाप
संविधानसभाया अध्यक्ष सुभाष नेम्वाङं लोकतन्त्र व शान्ति प्रकृयायात निष्कर्षय् थ्यंकेत निर्धारित ईलय् हे संविधान निर्माण यायेमाःगु खँय् बः बियादीगु दु ।
अन्तर्राष्ट्रिय शान्ति दिवसया लसताय् सोमवाः मानव अधिकार सञ्जाल व शान्ति कार्य पुचलं इलामय् याःगु ज्याझ्वलय् न्ववानादिसें सभामुख नेम्वाङं दलतय्सं उच्चस्तरिय संयन्त्र आः तक गठन मयाःगु धयादिसें संविधान निर्माणयात प्राथमिकताय् तयाः तत्काल संयन्त्र निर्माण यायेत इनाप यानादिल । राजनीतिक दलत दथुइ उच्चस्तरिय सम्झदारी कायम जुइफुसाः जक ईलय् हे संविधान निर्माण जुइगु बिचाः वयेकलं प्वंकादिल ।
संविधानसभाया ईलय् थःथःगु पार्टीया घोषण पत्राय् न्ह्यथनातःगु खँत लुमंकेत दक्वं राजनीतिक दलतय्त सभामुख नेम्वाङं इनाप यानादिल । वयेकलं संविधान निर्माण मजुतल्ले दलत दथुइ सहमति व सम्झदारी जारी जुइमाःगु खँय् बः बियादिसें न्हापा नं देशय् संकट वःगु ईलय् तःधंगु राजनीतिक दलत छप्पँ जूगु दसू बियादिल ।
