छठ लिपा स्वक्वःगु मधेश आन्दोलन : यादव
मधेशी जनअधिकार फोरमया अध्यक्ष उपेन्द्र यादवं छठ लिप स्वक्वःगु मधेश आन्दोलन शुरु जुइगु खँ धयादीगु दु ।
सुनसरीया इनरुवाय् पत्रकारत नाप खँल्हाबंला यानादिसें अध्यक्ष यादवं वर्तमान सरकार मधेशया मुद्दा प्रति उदासीन जूगुलिं मधेशयात अधिकार सम्पन्न दयेकेत स्वक्वःगु मधेश आन्दोलनया विकल्प मदुगु धयादिल । वयेकलं संयुक्त मधेशी मोर्चा नाप जूगु सम्झौता कार्यन्वन यायेत सरकारं ध्यान मब्यूगु धयादिसें पटक पटक सरकारयात सम्झौता कार्यन्वया यायेत इनाप याःसां उकी च्यूताः मतःगु द्वपं बियादिल ।
वयेकलं मधेशी जनतायात अधिकार सम्पन्न मदयेकूतल्ले आन्दोलन मदीकेगु ख्याच्वः नं बियादिल । वयकेलं स्वक्वःगु मधेश आन्दोलनय् दक्वं मधेशीतय्त समावेस यायेगु नं जानकारी बियादिल । माओवादीं स्वन्ति लिपा याइगु आन्दोलन नाप सहकार्य यानाः वनीगु बारे छुं नं निर्णय मजुनिसां माओवादीं मधेशया मुद्दायात दुथ्याकुसा सहकार्य जुइफइगु बिचाः यादवं प्वंकादिल ।
अथेहे फोरम अध्यक्ष यादवं वर्तमान सरकारयात क्वथलिगु ज्या मेपिं सुनां मयासें नेपाली कांग्रेसया सभापति गिरिजाप्रसाद कोइरालां हे याइगु दाबी यानादिल । वयेकलं सरकार क्वथलेगु व गठन यायेगु ज्याय् माहिर कोइरालां थः म्हाय् सुजाता कोइरालायात प्रधानमन्त्री दयेकेत थ्व सरकार क्वथलिगु दाबी यानादिल ।
