प्रमं नेपालं ओबामा नापलाइगु
येँ (सन्ध्या टाइम्स)/ संयुक्त राष्ट्रसंघया महासभाय् ब्वति कायेत प्रधानमन्त्री माधव नेपाल थौं न्युयोर्क झाइगु ज्याझ्वः दु। वय्कः २३ सदस्यीय पुचःया नेतृत्व यासें थौं बहनी ८:३० बजे उखे झाइ ।
प्रमया लिसें वय्कःया कलाः गायत्री नेपाल, परराष्ट्रमन्त्री सुजाता कोइरालालिसें २३ म्ह दुजः पुचलय् दुथ्याः। महासभाय् प्रमं नेपालं असोज १० गते संवोधन यानादी।
संवोधनया झ्वलय् प्रम नेपालं विश्वव्यापी जलवायु परिवर्तन व नेपालय् न्ह्यानाच्वंगु शान्ति प्रक्रिया बारे खँ न्ह्यथनादी। अथे हे वय्कलं शान्ति सेना बारे नं संवोधन यानादी।
प्रम नेपालं ८ गते अमेरिकी राष्ट्रपति बाराक ओबामायात नापलानाः सहलह यानादी। वय्कःयात नापलायेगु लागिं ओबामां ई मिले यायेधुंकूगु दु। लिसें वय्कलं बेलायतया प्रधानमन्त्री गोर्डन ब्राउनलिसे नं सहलह यानादी। वकुन्हु हे वय्कलं इन्टरनेशनल हेल्थ पार्टनरशीप ज्याझ्वलय् नं संवोधन यानादीगु ज्याझ्वः दु ।
थःगु भ्रमण न्ह्यः थौं सुथय् प्रम नेपाल व उपप्रधानमन्त्री विजयकुमार गच्छदार दथुइ नं सहलह जूगु दु। उगु सहलह ज्याझ्वलय् नं मोहनिया इलय् अप्वया वनाच्वंगु बेसाःभाः व खाद्य संकट नियन्त्रण यायेगु लिसें प्रमपाखें न्युयोर्कय् यानादीगु ज्याखँया बारे बिचाः ब्याकेगु ज्या जूगु खः ।
