स्वंगू दलया बिस्कं बैठक थौं नं जारी
येँ (सन्ध्या टाइम्स)/राजनीतिक गतिरोध चीकेगु निंतिं न्ह्यानाच्वंगु स्वंगू दलया बैठक थौं नं च्वनेत्यंगु दु।
प्रधानमन्त्री माधव नेपालं थःगु अमेरिका भ्रमण न्ह्यः हे राजनीतिक सहमति कायम यायेगु कथं थौं बैठक च्वनाच्वंगु खँ धाःगु दु ।
थौं नेपाली कांग्रेस व एमालेया दथुइ बिस्कं बिस्कं बैठक च्वनाः सहमतिया एजेन्डा क्वःछिनाः जक स्वंगू दलया मंकाः बैठक च्वनीगु खँ सीदुगु दु ।
'कांग्रेस व एमालेया बैठकय् सहमति जुल धाःसा स्वंगू दलया बैठक च्वनेगु जुइ' एमालेया छम्ह नेतां धयादिल। बैठक एमालेया मू ज्याकू बल्खुइ च्वनाच्वंगु खः ।
माओवादीं प्रधानसेनापति प्रकरणय् राष्ट्रपतिं ल्ह्वंगु पलाः व उकिया विरुद्ध माओवादीं सदनय् हःगु संकल्प प्रस्तावया विकल्प मालेत थ्व बैठक च्वनाच्वंगु दु ।
एमाले, कांग्रेस व माओवादीं थःपिनि अडान मत्वःतूगुलिं यानाः बैठकय् सहमति जुइ फयाच्वंगु मदु ।
