कपिलवस्तु बन्द, सिराहालय् प्रदर्शन, कोशीइ यातायात बन्द
थः कार्यकर्ताया हत्या याःगु विरोधय् तराई मधेशी लोकतान्त्रिक पार्टीं थौं आह्वान याःगु कपिलबस्तु बन्दया कारणं अनया जनजीवन प्रभावित जूगु दु ।
वंगु बुधवाः बहनी प्यम्हेसिया पुचलं तमोलोपाया कार्यकर्ता सेरुल्लाह मुसलमान व रामप्रसाद चौधरीयात गोलीं कयेकाः स्याना बिउगु खः । उकिया विरोधय् थौं आह्वान याःगु बन्दं सदरमुकाम तौलिहवाया पसः व यातायात बन्द जुयाच्वंगु दु ।
उखे सिराहालय् प्रहरी यातनाया कारणं चन्द्रकुमार यादव सीगु घटनायात कयाः छानवीन आयोग दयेके माःगु माग यासें मधेशी जनअधिकार फोरमं गोल बजारय् टायर च्याकाः प्रदर्शन याःगु दु । थुिकं यानाः अनया जनजीवन नं तनावपूर्ण जुयाच्वंगु दु । वंगु छुं न्हि न्ह्यः एमालेया कार्यकर्ता उतिमलाल यादवयात स्याःगु द्वपनय् प्रहरीं चन्द्र- कुमार यादवयात ज्वंगु खःसा उगु हे चान्हय् प्रहरी हिरासत दुने चन्द्रकुमार यादव सीगु खः ।
उखे मोरङ्गया मस्जिदय् आक्रमण जूगु विरोधय् म्हिगःनिसें मुस्मां समुदायपाखें बन्द याःगु कोशी राजमार्ग थौं नं जारी जुयाच्वंगु दु ।
कोशी राजमार्ग अवरुद्ध यायेगु झ्वलय् उमिसं सीपिनि छेँजःयात क्षतिपूर्ति बीमाःगु घाःपाः जूपिंत निशुल्क वासःया व्यवस्था यायेमाःगु माग नं याःगु दु । म्हिगः स्थानीय प्रशासन व मुस्मां समुदाय दथुइ वार्ता जुयाः प्यंगू बुँदे सहमति जूसां मुस्मां समुदायं सरकारलिसें थप वार्ता यायेमाःगु खँ धासें थौं नं कोशी राजमार्ग बन्द याःगु खः । बन्दया झ्वलय् उमिसं राजमार्गया थीथी थासय् टायर च्याकाः प्रदर्शन यानाच्वंगु दु ।
