विविध भाषा साहित्य सम्मेलन बोडेय्

थिमि (सन्ध्या टाइम्स)/थुगुसीया झिंछक्वःगु विविध भाषा साहित्य सम्मेलन व सांस्कृतिक ब्वज्या वइगु नेपाल संवत् ११३० कछलाथ्व १ (कार्तिक १) म्हपुजा कुन्हु बोडेया नछु त्वालय् जुइगु जूगु दु ।

विविध भाषा साहित्य समाजया न्वकु ज्ञानकृष्ण बुढाया अध्यक्षताय् जूगु साहित्यकार व साहित्यप्रेमितय् मुँज्यां उगु खँ क्वःछिउगु खः। उगु सम्मेलन ताःलाकेत लुमिन खपेया अध्यक्षताय् ग्वसाः खलः नीस्वंगु दु। ग्वसाः खलःया न्वकु बुद्धकृष्ण चक्रधर, छ्याञ्जे सम्झना था व दांभरि प्रेमजङ्ग थापा श्रेष्ठ च्वनादीगु दु। नापं साहित्यिक संयोजक कथं अमर बली, मञ्च व्यवस्थापन संयोजक माधव साहुखलः व प्रचार प्रसार संयोजकय् दिने तमी च्वनादीगु दु ।

ग्वसाः खलःया दुजलय् रामशरण ब्यां, सुजना अदुवा, सविना तमी, रेणु था, राजु खम्बु, राजेन्द्र किला, दिलकृष्ण प्रजापति व बासुदेव माकः च्वनादीगु दु। समितिं साहित्य व सांस्कृतिक विधा बीत इनाप याःगु दु ।