नेप्से छवाःया दुने ११ अंकं थहां वन
येँ (सन्ध्या टाइम्स)/नेपाल स्टक एक्सचेन्जय् थ्व छवाःया दुने न्यान्हुयंकं जूगु शेयर कारोबारय् समग्र नेप्से परिसूचक १० दशमलव ६३ अंकय् थहां वंगु दु। वाःया न्हापांगु न्हि ६१७ दशमलव ३४ अंकं शुरु जूगु कारोबार वाःया लिपांगु न्हि ६२७ दशमलव ९७ अंकय् थ्यंकाः बजाः बन्द जूगु खः। थ्व स्वयां छवाः न्ह्यः नं न्यान्हु हे कारोबार जूगु खः ।
थ्व छवाःया दुने गुइगू कम्पनीया ४७७८ कारोबारं मुक्कं पीस्वंगू करोड चय्छगू लाख झिंस्वद्वः तका बराबरया झिंन्यागू लाख निद्वः व न्यासः कित्ता शेयर कारोबार जुल। थ्व वाः स्वयां न्ह्यःया वालय् नं गुइगू हे कम्पनीया ५६११ कारोबारं न्हय्गू लाख चय्गुद्वः व खुसः कित्ता शेयर न्याये-मी जुयाः मुक्कं चय्प्यंगू करोड स्वीच्यागू लाख गुइद्वः तका दांया कारोबार जूगु दु ।
छवाः न्ह्यःया कारोबारय् स्वयां नेप्से थहां वंसां थ्व वालय् जूगु कारोबारय् दांया ल्याखं धाःसा ९ दशमलव ४६ प्रतिशतं कुहां वःगु दु ।
अथे हे थ्व छवाःया कारोबारय् 'क' वर्गया कारोबार मापन याइगु सेन्सेटिभ इन्डेक्स २ दशमलव ८४ अंकं थहां वःगु दु। न्हापांगु न्हि १५७ दशमलव ६८ अंकं शुरु जूगु कारोबार लिपांगु न्हि १६० दशमलव ५२ अंकय् थ्यंकाः बजाः बन्द जूगु खः ।
'क' वर्गया कम्पनीया जक थ्व वालय् नीछगू करोड स्वीखुगू लाख तका दांया कारोबार जुल। थ्व नेप्सेय् जूगु कूल कारोबारया ४८ दशमलव ७५ प्रतिशत खः।
थ्व वालय् न्हय्गू करोड न्हय्गू करोड न्यय्गू लाख तका दां व च्यागू लाख पीनिद्व कित्ता शेयर कारोबार याःगु आधारय् नेशनल हाइड्रो पावर कम्पनी व दकलय् अप्वः प्यसः व स्वीगुंगू कारोबार याःगु आधारय् पशुपति डेभलपमेण्ट बैंक दकलय् न्ह्यःने लाःगु दु ।
