द्वन्द्व पीडितया निंतिं क्षतिपूर्ति निर्धारण समिति गठन
ऋषि धमला लगायतया मुद्धा लितकाल
सरकारं द्वन्द्व पीडितया निंतिं क्षतिपूर्ति निर्धारण यायेत शान्ति मन्त्री रकम चेम्जोङया संयोजकत्वय् खुम्ह दुजः दुगु अध्ययन समिति गठन याःगु दु । मन्त्रिपरिषदया आइतवाः च्वंगु बैठकं गठन याःगु उगु समितिं द्वन्द्वया ईलय् क्षति जूगु छेँ व जग्गा कब्जा बारे अध्ययन यानाः क्षतिपूर्ति निर्धारण याइ । समितिलय् गृह, अर्थ व महिला बालबालिका मन्त्रालययात प्रतिनिध कथं दुथ्याकातःगु दु ।
अथेहे बैठकं पत्रकार ऋषि धमाल, रामशुभक महत्तो व वीरेन्द्र केएमया मुद्धा लित कायेगु निर्णय नं याःगु दु । हातहतियार व खरखजाना ऐनअन्तर्गत धमला व मेपिं निम्ह पत्रकारतय् ज्वना कुनातःगु खसां लिपा अदालतया आदेश कथं धमला धरौतिइ रिहा जुसां मेपिं निम्ह पत्रकारतय्त अझ कुनातःगु दनी । पत्रकार धमला आइतवाः हे प्रधानमन्त्री माधवकुमार नेपलां यानादित्यंगु अमेरिका भ्रमणय् वनेत्यंगु दु ।
बैठकं देयन्यंकया अस्पताल विकास समिति नं विघटन यायेगु निर्णय याःगु दु । नापं बैठकय् प्रधानमन्त्री नेपालया अमेरिका भ्रमण व राष्ट्र संघंया महासभाया एजेण्डाया बारे सहलह जूगु खः ।
