नेपाली सेनां न्ह्यवलें नागरिक सर्वोच्चताया सम्मान याःगु दु : प्रधानमन्त्री
प्रधानमन्त्री माधवकुमार नेपालं नेपाली सेनां न्ह्यावलें नागरिक सर्वोच्चताया सम्मान याःगु खँ धयादीगु दु ।
ख्वपय् च्वंगु नेपाली सेनाया केन्द्र खरिपाटीइ आइतवाः अधिकृत आधारभूत तालिमया समापन ज्याझ्वलय् न्ववानादिसें प्रधानमन्त्री नेपालं राष्ट्रियता व सार्वभौमसत्ता संरक्षणया महत्वपूर्ण जिम्मेवारी सेनाया ब्वलय् वःगु धयादिल । वयेकलं धयादिल, - 'राष्ट्रियता व सार्वभौमसत्ता रक्षाया निंतिं नेपाली सेनाया गौरवपूर्ण इतिहास दु । थ्व दक्वं जात-जाति, भाषा, धर्म, समुदायया मंकाः सेना खः ।'
विश्व शान्ति स्थापनाय् सेनां म्हितुगु भूमिका राष्ट्रया निंतिं हे गौरवया विषय जूगु धयादिसें वयेकलं नेपाली सेनाया गौरवशाली भूमिकाया कारणं अमेरिकी राष्ट्रपति बारक ओवामां सःतुग बैठकय् थःम्हं ब्वति कायेत्यनाःगु जानकारी बियादिल ।
प्रधानमन्त्री नेपालं अधिकृत तालिक पूवंकुपिं १२४ जवान अधिकृततय्त इमान्दारी पूर्वक राष्ट्र व जनताया निंतिं ज्या यायेत निर्देशन बियादिल । भविष्यय् थप हाथ्या व व्यवधान वयेफुगुलिं इमान्दारीपूर्व ज्या यायेत निर्देशन बियादिसें वयेकलं अनुशासित जुया मानव अधिकार उल्लंघनया घटना जुइ मबीत नं सजग जुइत सेनाया अधिकृतय्त निर्देशन बियादिल ।
थ्वस्वयां न्ह्यः शनिवाः प्रधानमन्त्री नेपालं अमेरिकी राष्ट्रपति बारक ओवामा नापया बैठकया बारे नेपाली सेना लगायत स्वंगू सुरक्षा अंगया प्रमुखत नाप सहलह यानादीगु खः । रक्षामन्त्री विद्या भण्डारी व गृहमन्त्री भीम रावल नं दुथ्याःगु उगु बैठकय् अमेरिकी राष्ट्रपति नापया बैठकया एजेण्डा बारे सहलह जूगु खः ।
