एमाले व कांग्रेस दथुइ सहलह

सत्तारुढ दलत नेपाली कांग्रेस व नेकपा (एमाले) दथुइ वर्तमान राजनीतिक गतिरोध अन्त्यया बारे सहलह जूगु दु ।

प्रधानमन्त्री माधवकुमार नेपालं संयुक्त राष्ट्र संघया खुइप्यक्वःगु महासभाय् ब्वति काये न्ह्यः राजनीतिक गतिरोध अन्त्य यायेगु कुतः स्वरुप आइतवाः सुथय् निगू दल दथुइ बैठक च्वंगु खः । एमालेया मू ज्याकू बल्खुइ जूगु बैठकय् संसदय् दक्वसितं स्वीकार्य जुइ कथंया संकल्प प्रस्ताव न्ह्यब्वयेगु बारे सहलह जूगु खः ।

बैठकय् कांग्रेसया महामन्त्री विमलेन्द्र निधि, नेता कृष्णप्रसाद सिटोला व एमाले पाखें महासचिव ईश्वर पोखरेल व नेता भरतमोहन अधिकारीं ब्वति कयादीगु खः ।

निगू दल दथुइया सहलहलय् प्रधानमन्त्रीया अमेरिका भ्रमणया एजेण्डा बारे नं सहलह जूगु खः ।