सहमतिया कुतः सकारात्मक : प्रधानमन्त्री नेपाल
प्रधानमन्त्री माधवकुमार नेपालं वर्तमान गतिरोध अन्त्यया निंतिं जुयाच्वंगु सहमतिया कुतः सकारात्मक जूगु खँ धयादीगु दु ।
नेकपा (एमाले) येँ क्षेत्र नं २ व ३ नं मंकाः रुपं शनिवाः मोहनिया लसताय् ग्वसाःग्वःगु ज्याझ्वलय् प्रधानमन्त्री नेपालं राजनीतिक जटिलता अन्त्यया निंतिं जुयाच्वंगु कुतः सकारात्म जूगु धयादिसें थः राष्ट्र संघया महासभाय् ब्वति का:वनेन्ह्यः गतिरोध अन्त्य यायेगु बिचाः दुसां ई म्हो जूगुलिं व सम्भव मजूगु धयादिल ।
प्रधानमन्त्री नेपालं गतिरोध अन्त्य यायेत जुयाच्वंगु संवाद व सहलह यात दक्व पक्षं सकारात्मक रुपं काःगु धयादिसें पुलांगु जटिल समस्या नं संवाद व सहलह मार्फत समाधान यानाःगु धयादिल । वयेकलं गतिरोध अन्त्यया निंतिं कांग्रेस नाप नं सहलह जुयाच्वंगु धयादिल ।
शनिवाः सुथय् जक कांग्रेस नेतात नाप नापलानादिम्ह प्रधानमन्त्री नेपालं कांग्रेस नेतातय्सं एमालेया नेतृत्व पाखें हे सरकारयात खतरा दुगु खँ धा:गु खुलासा यानादिसें थःगु पार्टीया नेतृत्वया सरकारयात एमालें न्ह्यवलें ग्वाहालि याइ धयादिल ।
वयेकलं सरकारं निरन्तर बाधा, अवरोधया सामना यानाच्वनेमाःगु धयादिसें उकीयात सकारात्मक रुपं व्यवस्थापन यायेत सरकार लगे जूगु धयादिल । बाधा, विरोधयात हल यायेत सरकार नाप आँट दुगु व उकीयात सकारात्मक बिचाः तयाः लोकतान्त्रिक मान्यता कथं सरकार न्ह्या: वने चाहेजूगु खँ प्रधानमन्त्री नेपालं धयापदल ।
अथेहे न्हूगु संविधान निर्माण ईलय् हे जुइगुलि शंका मयायेत इनाप यानादिसें प्रधानमन्त्री नेपालं २०४७ सालय् स्वलाःया दुने संविधान निर्माण जूगु दसू बियादिल ।
