विशेष सुरक्षा योजनाय् माओवादीया नं समर्थन : गृहमन्त्री
गृहमन्त्री भीम रावलं प्रमुख प्रतिपक्षी दल एकीकृत नेकपा (माओवादीं) नं सरकारं हःगु विशेष सुरक्षा नीतियात समर्थन याःगु खँ धयादीगु दु ।
शनिवाः ख्वपय् नेकपा (एमाले)या नगर कमिटीं मोहनिया लसतय् यायेगु ज्याझ्वलय् न्ववानादिसें गृहमन्त्री रावलं सरकारं हःगु विशेष सुरक्षा नीति सफल जुयातुं त्वतीगु धयादिसें सुरक्षा नीति पाखें अपराधीक गिरोह बाहेक मेपिं ग्यायेम्वाःगु धयादिल ।
देय् दुने १०९ व स्वनिगः दुने १८गू अपराधिक पुचः सक्रिय जुयाच्वंगु जानकारी बियादिसें मन्त्री रावलं दक्वं अपराधिक गिरोहयात नियत्रणय् कायेगु निंतिं ज्या न्ह्यायेधुंकूगु धयादिल । विषेश सुरक्षा नीति लागु जुइधुंकूगुलिं आः नेपाःमित ग्यायेम्वाःगु व त्रासपूर्ण वातावरणय् म्वायेम्वाःगु धयादिल ।
मन्त्री रावलं उगु ज्याझ्वलय् ब्वति कायेत वनेगु झ्वलय् माओवादी कार्यकर्तातय्सं हाकूगु ध्वाँय् क्यनेफुगुलिं जडीबुटीइ निसें ख्वपः तक ३००म्ह सुरक्षाकर्मी तैनाथ यानातःगु खसाः युथफोर्सया कार्यकर्तातय्सं नं गृहमन्त्रीया स्कर्टिङ याःगु खः ।
