राष्ट्रसंघया ग्वाहालिइ जनविद्रोह : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' माओवादी नाप ख्याः मयायेत दलतय्त चेतावनी बियादीगु दु । वयेकलं माओवादी नाप ख्याः याःसा राष्ट्रसंघया ग्वाहालिइ जनविद्रोह यायेगु ख्याच्वः नं बियादिल ।
शनिवः सुथय् भरतपुरय् क्रान्तिकारी पत्रकार संघं ग्वसाःग्वःगु पत्रकार सम्मेलनय् न्ववानादिसें वयेकलं धयादिल, - 'माहनी स्वन्ति दुने सहमति जुसाः माओवादी नेतृत्वया राष्ट्रिय सरकार गठन जुइफइ, मखुसाः जनविद्रोह जुइ गुकीयात राष्ट्रसंघं नं ग्वाहालि याइ ।'
राष्ट्रसंघया बडापत्रय् हे दलीय असहमति जुसाः जनतां जनविद्रोह याये दइगु व्यवस्था दु धयादिसें वयेकलं राष्ट्रसंघं ग्वाहालि याइगु बिचाः प्वंकादिल । वयेकलं पत्रकार सम्मलेनय् अज्याःगु आन्दोलन राष्ट्रिय नागरिक सर्वोच्चता व राष्ट्रिय स्वाधीनताया निंतिं जूगुलिं दक्वंसित साथ बित नं इनाप यानादिल । माओवादीया एजेण्डायात कांग्रेस व एमालें सम्बोधन मयासाः जनविद्रोहया विकल्प मदुगु नं वयेकलं दाबी यानादिल ।
माओवादी अध्यक्ष प्रचण्डं राष्ट्रपतिया क्षेत्राधिकारया विषयलय् संसदय् सहलह यायेब्यूसाः माओवादी सहमतिलय् वयेफुगु धयादिल । वयेकलं मोहनी स्वन्ति दुने दलत दथुइ न्हूगु सहमति जुसाः जनविद्रोहया स्थिति मवेफुगु बिचाः प्वंकादिल ।
माओवादीया लडाकूत सेना समायोजन विशेष समितिया हे मातहत जुइगु खँ धयादिसें प्रचण्डं नेपाली सेना नाप माओवादी लडाकूतय् समायोजन व अयोग्य लडाकूतय् पुर्नस्थापना बारे माओवादी गम्भीर जूगु धयादिल । वयेकलं शान्ति प्रकृय व न्हूगु संविधान निर्माण प्रति माओवादी न्हापा थें हे सक्रिय जूगु नं धयादिल ।
