वर्तमान सरकारयात मेगू चुनाव तक कांग्रेसं समर्थन याइगु
नेपाली कांग्रेसं संविधानसभां न्हूगु संविधान निर्माण यायेधुंकाः जुइगु मेगू चुनाव तक वर्तमान सरकारयात समर्थन यायेगु खँ धाःगु दु । शनिवाः सुथय् बालुवाटारय् प्रधानमन्त्री माधवकुमार नेपालयात नापलाना कांग्रेसया प्रतिनिधि मण्डलं वर्तमान सरकार प्रति पूर्ण समर्थन प्वंकूगु खः ।
कांग्रेसया कार्यवाहक सभापति सुशील कोइरालाया नेतृत्वय् वंगु कांग्रेसया प्रतिनिधिमण्डलं प्रधानमन्त्री लगायत एमाले नेतात नाप खँल्हाबंला यासें राजनीतिक गतिरोध अन्त्य यायेत मंकाः प्रस्ताव ह्येगु बारे सहलह याःगु खः । कांग्रेस व एमाले दथुइ नागरिक सर्वोच्चता प्रति प्रतिबद्धता प्वंकूसें सुयात नं द्वपं मब्यूसें संकल्प प्रस्ताव ह्येगु सैद्धान्तिक सहमति जूगु दु ।
अथेहे निगू दल दथुइ नखःया ईलय् बजाः भाः नियन्त्रण, दैनिक उपभोग्य वस्तुया अभाव, शान्ति सुरक्षा आदि विषयलय् नं खँल्हाबंला जूगु खः ।
खँल्हाबंलाय् कांग्रेस पाखें कार्यवहाक सभापति कोइराला नापं महामन्त्री विमलेन्द्र निधि, नेतात कृष्ण सिटौला व चक्रप्रसाद बास्तोला व एमाले पाखें प्रधानमन्त्री नेपाल लगायत एमाले महसचिव इश्वर पोखरेल, भरतमोहन अधिकारी, रघुजी पन्तया उपस्थिति दुगु खः ।
