'माओवादीया निर्णायक आन्दोलनं विश्व हे चकित जुइ'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' माओवादीं मोहनी लिपा निर्णायक आन्दोलन याइगु खँ धयादीगु दु ।
माओवादीं घोषणा याःगु आन्दोलनाय निगू चरणया लिप्पांगु न्हि नारायणघाटय् याःगु जनसभाय् न्ववानादिसें अध्यक्ष प्रचण्डं चितवनं हे निर्णायक आन्दोलन शुरु जुइगु धयादिसें उकीया निंतिं दिमागी रुपं तयार जुइत चितवनवासीतय्त इनाप यानादिल ।
वयेकलं धयादिल, - 'मोहनी लिपा निर्णायक आन्दोलन जुइ, व विद्रोहया आन्दोलनं जुइ, उकीया निंतिं छिकपिं तयार जुयादिसं ।
सफलताया निंतिं पटक पटक आन्दोलन यायेगु जनताया नियम जूगु धयादिसें थुगु आन्दोलनं विश्वयात हे चकित याइगु दाबी यानादिल । आः तक जूगु आन्दोलन ट्रेलर जक जूगु धयादिसें अध्यक्ष प्रचण्डं मोहनी लिपाया आन्दोलन फुल सीन जुइगु धयादिल । वयेकलं जनतां पूवंक त्याइगु न्हि नापं वयाच्वंगु अले वहे न्हि फटाहतय्सं पूवकं बुइगु दाबी नं यानादिल ।
माओवादीं राष्ट्रपतिया विरुद्ध संसदय् दर्ता याःगु संकल्प प्रस्ताव बारे एमाले व मधेशवादी दलया छुं सभासदतय्सं प्रस्तावयात समर्थन यायेगु बंच बीधुंकूगु धयादिसें वयेकलं संसदय् थ्व प्रस्ताव बारे सहलह जुसाः एमाले व मधेशवादी दलया छुं सभासदत माओवादीया पक्षय् वइगु दाबी यानादिल ।
माओवादी अध्यक्ष प्रचण्डं कांग्रेस व एमालेया बुद्धि मवगुलिं हे देशय् अस्थिरता ब्वलंगु धयादिसें दलतय् ज्यां याना देशय् न्हिनय् हे बहनी जूगु धयादिल । कांग्रेस व एमालेय् आः नं बुद्धि मवसाः उमिगु हविगत ज्ञानेन्द्रया स्वयां बेहाल जुइगु धयादिल ।
माओवादी शान्ति स्थापनाया निंतिं प्रतिबद्ध जूगु धयादिसें प्रचण्डं नागरिक सर्वोच्चता व जनचाहना कथं सत्ता स्थापना यायेत मोहनी लिपा निर्णयक आन्दोल यायेगु धयादिल ।
जनसभाय् माओवादीया झिम्ह स्वयां अप्वः नेतातय्सं ब्वति काःसां जर्नादन शर्मा 'प्रभाकरं' बाहेक मेपिं नेतातय्सं सभाय् सम्बोधन यानामदी । सभाय् माओवादी आन्दोलनया पीखुगू सुत्रीय माग पत्रया बारे नं जानकारी ब्यूगु खः ।
