न्हय्गू जिल्लाय् खाद्यान्न अभाव
येँ (सन्ध्या टाइम्स)/ मोहनि नखः न्ह्यःने वयाच्वंगु इलय् पश्चिम नेपाःया थीथी जिल्लाय् खाद्यान्न अभाव जूगु दु। खडेरीं दकलय् अप्वः पीडित जूगु गोरखा, बाजुरा, जाजरकोट, हुम्ला, दार्चुला, रुकुम व कालिकोट जिल्लाय् खाद्यान्न अभाव जूगु खः ।
उगु जिल्लाया थीथी गांया स्थानीय जनता प्यन्हु न्यान्हु तक न्यासि वयाः खाद्यान्न न्याः वयाच्वंगु दु ।
उखे सरकारी अधिकारीतय्सं धाःसा थःपिंके पर्याप्त मात्राय् खाद्यान्न दुगु तर ढुवानी यायेगु साधन मदयाः खाद्यान्नया अभाव जूगु खँ धाःगु दु ।
नेपाल खाद्य संस्थानया महाप्रबन्धक हरिनारायण साहं थःपिंके पर्याप्त खाद्यान्न दु धासें जहाज मदयाः याकनं खाद्यान्न थ्यंके मफयाच्वंगु खँ कनादीगु दु ।
वय्कःया कथं उगु न्हय्गू जिल्लाय् करिब न्याद्वः क्विन्टल जाकि थ्यंके फुसा समस्या ज्यनी ।
अन याकनं जाकि थ्यंकेत निर्देशन वयेधुंकूगुलिं याकनं हे समस्या ज्यनीगु खँ नं वय्कलं कनादिल। 'मोहनिया ई जूगुलिं जिमिसं याकनं जाकि थ्यंकेगु कुतः यानाच्वनागु दु।' वय्कलं धयादी। उखे इलय् माक्व वा मवःगुलिं थुगुसी न्हापा स्वयां नं खाद्यान्न समस्या तच्वये फइगु खँ धाःगु दु। विश्व खाद्य कार्यक्रमं पिथंगु लिपांगु प्रतिवेदनय् थ्व खँ न्ह्यथनातःगु खः ।
उखे कृषि मन्त्रालयं प्रक्षेपण याः कथं थ्व दँय् वा, छ्व व कःनि यानाः ४ लाख टन खाद्यान्न मगायेफु ।
