माधवयात सुनां बिल वामदेवया रिपोर्ट ?
येँ (सन्ध्या टाइम्स)/मनूत शक्तिइ मंत कि कर्मचारीतय्सं उमित गुलि तक हेपे याइगु जुयाच्वन धइगु खँ पुलांम्ह उपप्रधान एवं गृह मन्त्री वामदेव गौतमयात जूगु घटनां क्यना बिउगु दु। गौतम उपप्रम व गृह मन्त्री जुयाच्वंगु इलय् नेपाल प्रहरीया आईजी पदय् रमेश चन्दयात नियम मिचे यानाः नियुक्त याःगु खः। वरिष्ठताया ल्याखं धायेगु खःसा उगु पदय् रविन्द्रप्रताप शाह वयेमाःगु खः। तर वामदेव गौतमं अपाय्च्वः नियम हे मिचे यानाः आईजी दयेकूम्ह रमेश चन्दं थौं गौतम छुं हे पदय्सातकि धाःसा वय्कःया हे विरुद्ध जासुसी शुरु याःगु खँ सीदुगु दु ।
थौंकन्हय् एमाले दुने वामदेव गौतम माओवादीइ दुहां वनीन धकाः तसकं हल्ला जुयाच्वंगु दु। सूत्रया कथं वामदेव गौतम माओवादीइ दुहां वनीन धइगु थ्व जानकारी प्रहरी आईजी रमेश चन्दं हे प्रधानमन्त्री माधव नेपालयात बिउगु खः। वामदेव गौतमं माओवादी अध्यक्ष प्रचण्डयात ग्वःकः नापलात, मेपिं सु सु माओवादी नेतायात नापलात धइगु खँया फुक्क रिपोर्ट नं आईजी चन्दं प्रधानमन्त्रीयात बीधुंकूगु दु। वहे रिपोर्टया लिधंसाय् उकुन्हु प्रम माधव नेपालं थःगु पार्टी दुने नं माओवादीया भक्तत पिहां वयाच्वन धकाः न्ववानादीगु खः ।
आईजी रमेश चन्द थौंकन्हय् प्रहरीयात न्यानाहःगु ज्याकेट काण्डं यानाः संकटय् लानाच्वंगु दु ।
