कांग्रेसय् नं १६ गू प्रदेश
येँ (सन्ध्या टाइम्स)/ नेपाली कांग्रेसं ताः ई लिपा सहलह यानाः थौं पारित यायेत्यंगु राज्य पुनर्संरचना सम्बन्धी प्रतिवेदन नं जातीय आधार कथं जुइगु खँ सम्बन्धित सूत्रं धाःगु दु ।
सूत्रया कांग्रेसं १६ गू प्रदेशया प्रस्ताव यानातःगु दुसा उगु फुक्कं प्रदेशया आधार धाःसा न्हापाया जातीय गणराज्य कथं जुइगु खँ नं धाःगु दु। तर थ्व १६ गू प्रदेशया नां धाःसा कांग्रेसं किटान याःगु मदुनि ।
पार्टीं नां किटान यायेगु पाय्छि मजुइगु व उकिया नां किटान यायेगु ज्या संविधान सभां याइ धासें थुकथं नां किटान मयाःगु खँ नं उगु सूत्रं धाःगु दु ।
येँ, यल व ख्वप धायेवं नेवाःतय् लागा धइगु सीदुसा रसुवा, धादिङ आदि जिल्ला धायेवं तामाङतय् लागा धकाः सीदु थें थुकथं हे मेमेगु जातिया लागा नं सी दइगु जूगुलिं प्रदेशया नां मबिसे कांग्रेसं झिंखुगू प्रदेश तयार याःगु खँ नं सूत्रं धाःगु दु ।
