कांग्रेसया नं नेवाः पुचः
येँ (सन्ध्या टाइम्स)/ नेपाली कांग्रेसं नं नेवाःतय् पुचः दयेकीगु जूगु दु। थीथी राजनीतिक पार्टीतय् दुने नेवाः जातीय खलः पुचः स्वना वयाच्वंगु खःसा तःधंगु पार्टी जुयाः नं कांग्रेसय् धाःसा छुं हे जातीय संगठन मदयाच्वंगु खः। आः वयाः कांग्रेसं लोकतान्त्रिक नेवाः पुचःया नामं जातीय संगठन चायेकेत्यंगु खँ धाःगु दु। थ्वहे वइगु असोज ५ गते सोमवाः कुन्हु परोपकार स्कूलय् छगू तुच्चा ज्याझ्वः यासें थ्व संस्थाया सार्वजनिक घोषणा नं याइगु खँ धाःगु दु।
नेपाली कांग्रेसया छम्ह जिल्ला दुजःया संयोजकत्वय् उगु पुचःया घोषणा याइगु खँ नं कांग्रेस सम्बद्ध सूत्रं धाःगु दु। कांग्रेसया नेवाः सभासद्त थौंकन्हय् नेवाः स्वायत्त प्रदेश सहितया संविधान दयेकेमाः धइगु अभियानय् सक्रिय जुयाः लगे जुयाच्वंगु दु ।
