ख्वपया निगू सम्मेलनय् निता हे खँ

ख्वपय् मोहनिया ताकाय् दशकौं न्ह्यवंनिसें जुइगु याना वयाच्वंगु निगू तःधंगु साहित्यिक ज्याझ्वः नकतिनि क्वचाल । ख्वपय् जुइगु थ्व निगुिलं साहित्यिक सम्मेलन आः नेवाःतय् गौरवया विषय जुइधुंकल धाःसां जिउ । निगुलिं सम्मेलनय् नेवाःतय्सं उतिकं हे सहभागिता क्यनाः ज्याझ्वःयात झःझः धायेकी ।

तर विडम्बना छु धायेबलय् छगू हे लागाय् जुइगु ज्याझ्वः खःसां उमिगु बिचाः व नारा धाःसा सर्गः-पाःताः हे पाइ थें पानाच्वंगु खनेदु । छगू इलय् विराट साहित्य सम्मेलनं भाषा म्वाःसा जाति म्वाइ धकाः नारा बीगु याना वयाच्वंगु खःसा उकियात हे लिसः बी थें साहित्य तःमुँज्यां जनता म्वाःसा भाषा म्वाइ धइगु मेगु नारा बीगु याइगु खः । आः देय् राज्य पुनस्रंरचना जुयाः संघीय व्यवस्थाय् वनेगु तयारी जुयाच्वंगु दु । थ्व मुद्दाय् नं ख्वपया थ्व निगू साहित्यिक अभियानकर्तातय् बिचाः सर्गः-पाःताः थें पानाच्वंगु दु । विराट सम्मेलनं नं आः नेवाःतय् लागिं जातीय स्वशासनय् आधारित संघीय व्यवस्था माः धकाः माग यानाच्वंगु दुसा उखे साहित्य तःमुँज्यां उकिया अःखः संघीय व्यवस्था वल धाःसा देय् हे कुचा दली धकाः मेगु खँ पित हयाच्वंगु दु । ख्वपया सम्मेलनय् पिहां वःगु थ्व निता खं नेवाःतय् दथुइ नं संघीय व्यवस्थायात कयाः निताजिया बिचाः दु धकाः सन्देश बीत स्वःगु दु । नेवाःतय्त विभाजित याइगु थज्याःगु बिचालं कन्हय् जुइगु राज्य पुनस्रंरचनाय् झीगु भूमिका छु जुइ धइगु खँयात समेत विवादय् लाकीगु खतरा दु । समग्र नेवाःतय् उन्नति जुइगु ज्याय् छप्वाः म्हुतु जूसा बांलाइगु खः ।

More Stories Like this