च्याम्ह जर्नेलं मुद्दा लितकाल
नेपाली सेनाया च्याम्ह रथीतय्सं माओवादी नेतृत्वया सरकारया पाले थःपिनिगु म्याद थप मयाःगु सम्बन्धय् सर्वोच्च अदालतय् ब्यूगु रित लितकायेत दर्ता या:गु निवेदन सर्वोच्च अदालतं स्वीकार याःगु दु । न्यायाधीश कृष्णप्रसाद उपाध्यायया इजलासं थ्व रित लितकायेत स्वीकृत याःगु खः ।
सरकारं थःपिनिगु म्याद थप यायेधुंकूगुलिं मुद्दा लितकायेत वंगु मंगलवाः सर्वोच्च अदालतय् च्याम्ह रथीतय्सं मंकाः निवेदन दर्ता याःगु खः । माओवादी सरकारं उमिगु म्याद थप यायेत अस्वीकार यानाः अवकाश बीगू निर्णय यायेवं सरकारी निर्णय बदर यायेत माग यासें च्याम्ह रथीतय्सं २०६५ चैत १० गते रिट दायर याःगु खः ।
उकीया सुनुवाइ कथं न्यायाधीश कल्याण श्रेष्ठया इजलासं च्याम्ह रथीतय्त अवकाश बीगू रक्षा मन्त्रालयया निर्णय कार्यान्वयन मयायेत वंगु चैत ११ गते अन्तरिम आदेश जारी याःगु खसाः लिपाः रक्षा मन्त्रालयं उगु निर्णयया विरुद्ध दायर याःगु मेगू रिटय् न्यायाधीशत अनुपराज शर्मा व प्रेम शर्माया मंकाः इजलासं वंगु वैशाष २५ गते आदेशयात निरन्तरता ब्यूगु खः ।
