स्पष्टिकरण प्रति मातृकाया आपत्ति
स्पष्टिकरण पेश यायेत झिंन्यान्हु माग
पुर्नगठित नेकपा (माओवादी)या अध्यक्ष मातृका यादवं थःत सभासद पदं चीकेगु सम्बन्धय् स्पष्टिकरण पेश यायेत झिन्यान्हूया ई फ्वनादीगु दु ।
कार्यव्यवस्था समितिं सभासद पुष्पा भूषालया संयोजकत्वय् गठन याःगु उपसमितिया बिहीवाः च्वंगु बैठकय् बयान बियादिसें नेता यादवं थःम्हं थ्वस्वयां न्ह्यः हे एकीकृत नेकपा (माओवादी)या प्रमुख सचेतक पोष्टबहादुर बोगटी नाप राजीनामा बीत संविधानसभाय् न्ववायेगु ई फ्वनाःगु खसाः ई मब्यूगु धयादिल ।
वयेकलें थःम्हं माओवादी पार्टीयात त्वताःगु मखसें मेपिसं माओवादीयात त्वःतुगु दाबी यानादिल । वयेकलं सभासद पदं चीकेत एनेकपा (माओवादीं) ब्यूगु उजुरीया आधारय् फ्वंगु स्पष्टीकरण प्रति आपत्ति प्वंकादिसें अपराधीतय्त थें पौ च्वयाः थौया कन्हय् स्पष्टिकरण कायेगु मखु धयादिल । वयेकलं स्पष्टिकरणया निंतिं थःत झिन्यान्हुया ई माःगु धयादिल ।
बयान लिपाः संचारकर्मीत नाप खँल्हाबंला यानादिसें नेता यादवं थःम्हं संविधानसभाया बैठकय् ब्वति नं मयाःगु व तलब नं मकायाःगु धयादिसें थः सभासद मजूगु व थुकी कानुनी रुप जक ल्यँ दनीगु धयादिल । अथेहे वयेकलं एनेकपा (माओवादीं) थः नापं सभासद पदं चीकेत उजुरी ब्यूम्ह सभासद जगत यादव धाःसा थःगु पार्टीया पाखें संसदीय संविधानसभायया मोर्चाय् दुगु धयादिल ।
