लडाकू नियन्त्रण कार्यविधियात विशेष समितिया मेगू बैठकं पारित याइगु
माओवादी लडाकूतय् रेखदेख, नियन्त्रण व निर्देशन कार्यविधि प्राविधिक समितिं विशेष समितिइ न्ह्यब्वःगु दु । उगु कार्यविधिलय् माओवादी लडाकूयात पार्टीया चेन अफ कमाण्डं चीकाः विशेष समितिया नियन्त्रणय् ह्येगु खँ न्ह्यथंनातःगु दु ।
विशेष समिति व प्रावधिक समितिया बिहीवाः च्वंगु मंकाः बैठकं प्राविधिक समितिं माओवादी लडाकूतय्सं पालना यायेमाःगु आचारसंहिता नं न्ह्यब्वःगु खः । बैठकं थप सहलह यानाः उकीयात परिमार्जन यानाः विशेष समितिया मेगू बैठकं पारित यायेगु निर्णय जूगु खँ समितिया प्रवक्ता माधव घिमिरे कनादिल ।
भदौ २१ गते विषेश समिति व प्राविधिक समितिया मंकाः बैठक च्वनेवं प्राविधिक समितियात माओवादी लडाकूयात नियन्त्रण यायेगु निंतिं कार्यविधि व आचारसंहिता तयार यायेत निर्देशन ब्यूगु खः । उगु निर्देशन कथं समितिं तयार याःगु कार्यविधि व आचारसंहिता मंगलवाः प्रधानमन्त्री माधवकुमार नेपालयात लःल्हायेगु ज्या जूगु खः ।
