मिजं बेपत्ता जूगुलिं मिस्तय्त पीडा

येँ (सन्ध्या टाइम्स)/ झिदँ ताःहाकःगु द्वन्द्वय् बेपत्ता जूपिं थ्यंमथ्यं झिंस्वसः मनूया स्थिति अझं अज्ञात जुयाच्वंगु खँ अन्तर्राष्ट्रिय रेडक्रस आईसीआरसीं धाःगु दु। बेपत्ता जूपिनि थःथिति नापलानाः आईसीआरसीं तयार याःगु छगू प्रतिवेदनय् उगु खँ धयातःगु दु ।

उगु रिपोर्टय् बेपत्ता जूपिं मध्ये ९० प्रतिशत मिजंत जूगुलिं उमिगु छेँजःयात तःधंगु समस्या जुयाच्वंगु खँ न्ह्यथनातःगु दु। उमिगु परिवारया आर्थिक अवस्था नं कमजोर जुजुं वनाच्वंगु दु ।

आईसीआरसीं बाँके, बर्दिया व रोल्पा लगायत थीथी झिगू जिल्लाया अध्ययन यानाः उगु रिपोर्ट तयार याःगु खः।
बेपत्ता जूपिनि छेँजःपिं अझ नं थः मनूत लिहां वइगु आशाय् च्वनाच्वंगु दनि। उमि छेँजःपिंसं बेपत्ता जुयाच्वंपिं थःथितिया बारे छानवीन यानाः उकिया सत्य तथ्य सार्वजनिक यायेमाःगु माग याःगु खँ नं रिपोर्टय् न्ह्यथनातःगु दु ।

रिपोर्टय् धयातः कथं बेपत्ता परिवारया आवश्यकता आपालं दु तर मनू हे सीगु खः लाकि मखु धइगु बारे आधिकारिक लिसः मवःगुलिं उमिसं सत्यतथ्य सीके चाहे जुयाच्वंगु दु। आपालं धइथें मिजंत बेपत्ता जुयाच्वंगुलिं दकलय् अप्वः मिस्त प्रभावित जुयाच्वंगु दु। थुकिं यानाः मिस्तय्त जग्गा न्याये-मीगु व प्रशासनिक ज्या यायेत थाकुया च्वंगुलिं अप्वः धइथें मिस्त मानसिक रुपं विक्षिप्त जुयाच्वंगु खँ नं रिपोर्टय् न्ह्यथनातःगु दु ।

मेखे उमि मस्तय्त ब्वलंकेगु व आखः ब्वंकेमाःगु थेंज्याःगु पारिवारिक बोझं यानाः उमिगु जीवन अझ कष्टकर जुया वनाच्वंगु खँ नं प्रतिवेदनय् धयातःगु दु ।