स्थानीयपाखें झलनाथया छेँ घेराउ
येँ (सन्ध्या टाइम्स)/सत्तारुढ पार्टी नेकपा(एमाले)या अध्यक्ष झलनाथ खनालया डल्लो आवास लागाया छेँय् पाः तयातःपिं सुरक्षाकर्मीतय्सं स्थानीय मनूतय्त बाम्ह सिक्क दायाहःगु विरोधय् म्हिगः सलंसः स्थानीय मनूत वयाः वय्कःया छेँ घेरे यात ।
अन पाः च्वनीम्ह डीके बानिया नांम्ह असईं म्हीग स्वम्ह स्थानीय मनूतय्त दाये फक्व दायाहःगु घटनाया विरोधय् म्हिगः अध्यक्ष खनालया छेँ घेरे याःगु खः। लिसें उमिसं दोषी असईयात कारवाही यायेमाः धकाः अन नाराबाजी समेत याःगु खः। लिपा स्वयम्भु प्रहरी चौकीपाखें उम्ह असईयात कारवाही यायेगु, स्थानीय मनूतय् न्ह्यःने माफी फ्वंके बीगु व दाःबलय् तंगु स्थानीय मनूया मोबाइल क्षतिपूर्ति बीगु सहमति यायेवं घेराउ बन्द जूगु खः ।
खनालया छेँय् पाः च्वनीपिं सुरक्षाकर्मीतय्सं अय्लाः त्वनाः दुर्व्यवहार याइगु, स्थानीय मिस्तय्त हायेकीगु खँ नं धाःगु दु ।
