स्वीस राजदूतं गिरिजा नापलात
येँ (सन्ध्या टाइम्स)/ नेपाःया निंतिं स्वीट्जरल्यान्डया राजदूत थोमस ग्रासं नेपाली कांग्रेसया सभापति व पुलांम्ह प्रधानमन्त्री गिरिजाप्रसाद कोइरालयात थौं सुथय् नापलानाः खँल्हाबल्हा यानादीगु दु ।
कोइराला निवास महाराजगञ्जय् जूगु उगु खँल्हाबल्हाया झ्वलय् राजदूत ग्रासं न्ह्यानाच्वंगु संविधान दयेकेगु ज्या व शान्ति प्रक्रिया बारे चिउताः प्वंकादीगु खः। लिसें राजदूत ग्रासं राजनीतिक पार्टीतय् दथुइ ब्वलनाच्वंगु राजनीतिक विवादया कारण संविधान च्वयेगु ज्याय् तकं लिच्वः लाये फइगु खँय् नं चिउताः प्वंकादीगु खः ।
लिसलय् सभापति कोइरालां उच्चस्तरीय राजनीतिक संयन्त्र दयेकेगु कुतः जुयाच्वंगुलिं संविधान इलय् बने जुइगु खँ विश्वस्त जुइत राजदूत ग्रासयात आग्रह यानादीगु खः।
माओवादी व सत्तारुढ दलतय् दथुइ ब्वलनाच्वंगु विवादयात कयाः थीथी देय्या राजदूततय्सं चिउताः प्वंकेगु यानाच्वंगु दु ।
