नेप्से हाकनं कुहां वन
येँ (सन्ध्या टाइम्स)/थ्व वालय् शुरुं निसें थहां वनाच्वंगु नेप्से परिसूचक म्हिगःया कारोबारय् लक्ष्मी, हिमालयन व स्टायण्डर्ड चार्टर्ड बैंकय् वःगु र्हासया लिसें नेप्से परिसूचक नं कुहां वंगु दु। म्हिगः म्हो जक कम्पनीया कारोबार कुहां वंसां राष्ट्रिय वीमा संस्थानया शेयरय् दकलय् अप्वः ३४५/- तका कुहां वयेवं उकिया प्रत्यक्ष लिच्वः नेप्से लाःवंगु खः ।
कारोबार शुरु जुगु करीब वःगु छघौत्या तक बुलुहु्ँ थहां वनाच्वंगु खःसा वयां लिपा कुहां वनेगु क्रमं निरन्तरता कायेवं म्हिगः नेप्से १ दशमलव ५४ अंकं सामान्य कुहां वयाः ६२८ दशमलव ३४ अंकय् थ्यन। अथे हे सेन्सेटिभ नं म्हिगः शून्य दशमलव ६ अंकं कुहां वःगु दुसा फ्लोट शून्य दशमलव १९ अंकं कुहां वल ।
म्हिगः जूगु कारोबारय् लक्ष्मी बैंकया शेयरय् ८३/-, हिमालयन बैंकया शेयरय् ३१/- व स्टायण्डर्डया शेयरय् २५/- तका कुहां वयेवं वाणिज्य समुह नं सामान्य १ दशमलव ३३ अंकं कुहां वयाः ६२७ दशमलव २९ अंकय् थ्यन ।
राष्ट्रिय वीमा संस्थानया शेयरय् वःगु उच्च र्हासया कारणं वीमा समुह दकलय् अप्वः १८ दशमलव २८ अंकं कुहां वयाः ६११ दशमलव ४९ अंकय् थ्यन। जलविद्युत समुह नं चिलिमे हाइड्रो पावरया शेयरय् प्रति कित्ता ३०/- तकां कुहां वयेवं थुगु समुह १० दशमलव ६७ अंकं कुहां वयाः ८३३ दशमलव२५ अंकय् थ्यंगु दु। विकास बैंक समुह ५ दशमलव शून्य ९ अंकं कुहां वयाः ६५१ दशमलव ३५ अंकय् थ्यंगु दु ।
मेखे व्यापार व होटल समुहया कारोबार जूसां छुं थुगु समुहलय् छुं हिउपाः धाःसा मवः। मेखे म्हिगःया कारोबारय् फाइनान्स समुह छगू जक २ दशमलव ३ अंकं थहां वनाः ६३७ दशमलव ५३ अंकय् थ्यंगु दु ।
अथे हे म्हिगः नेप्सेया लिसें दां व शेयर कारोबार नं कुहां वःगु दु। म्हिगः चय्गुद्वः स्वसः व न्यय्गुंगू कित्ता शेयरं खुगू करोड झिंस्वंगू लाख नीप्यद्वः तका दांया कारोबार जुल । म्हिगःया ग्लोबल बैंकया शेयरधनीतय्सं दकलय् अप्वः प्रति कित्ता ४९/- तका नाफा कमे याःगु दु ।
कारोबार याःगु कम्पनीत मध्ये स्टायण्डर्ड चार्टर्डं दकलय् अप्वः न्हय्गुंगू लाख ख्वीस्वद्वः तका दांया कारोबार याःगु दु।
मेखे ग्लोबल बैंकं दकलय् अप्वः कमे याःगु दुसा राष्ट्रिय वीमा संस्थानं दकलय् अप्वः गुमे याःगु दु ।
