' संकल्प प्रस्तावय् सहलह याके मब्यूसा स्वक्वःगु जनआन्दोलन निश्चित'
संयुक्त राष्ट्रिय जनआन्दोलन समिति नेपालया मू छ्याँजे नेत्रविक्रम चन्द विप्लबं राष्ट्रपतिया पला: विरुद्धया संकल्प प्रस्तावय् सहलह याके मब्यूसा स्वक्वःगु जनआन्दोलन निश्चित जूगु खँ धयादीगु दु ।
जनताया प्रतिनिधिया सर्वोच्च निकाय व्यवस्थापिका संसदय् दर्ता याःगु संकल्प प्रस्तावय् सहलह यायेत निन्हु प्यन्हु दुने कांग्रेस व एमाले सहमत मजूसा माओवादीं जनआन्दोलनया गृहकार्यपाखे वनेगु स्पष्ट यानादिल ।
क्रान्तिकारी पत्रकार संघ अवध राज्य समितिं थौं बुटवलय् याःगु पत्रकार नापलाये ज्याय् नेता विप्लवं थज्याःगु धयादीगु खः । संकल्प प्रस्तावय् सदनय् सहलह जूसा प्रस्ताव पारित मजूसां नं थःपिंत स्वीकार्य जुइगु स्पष्ट यासें वय्कलं अथे जूसा मुलुकं नं राजनीतिक निकास दइगु धयादीगु दु । कांग्रेस व एमालेया छुं नेताया अपरिपक्वता व निहीत स्वार्थं मुलुकय् गृहयुद्ध व फासीवादया खतरा लिक्क वःसां नं माओवादीया संयमतां आःतक व ज्यंगु वय्कलं स्पष्ट यानादीगु दु ।
