'वार्ता व सम्वादं सहमति यानाः वनेगुया विकल्प मदु'
प्रधानमन्त्री माधवकुमार नेपालं देय्या समस्या समाधनया निंतिं दक्वं राजनीतिक दल व विशेष यानाः प्रमुख दलत दथुइया सहमतिया आवश्यकता जूगु धयादिल ।
बिहीवाः येँय् गिरिजाप्रसाद कोइराला श्रम प्रतिष्ठानया उल्लेज्या यानादिसें प्रधानमन्त्री नेपालं वार्ता व सम्वादं सहमति यानाः न्ह्या वनेगुया मेगू विकल्प मदुगु धयादिल । वयेकलं देय्या समस्या प्रति मेपिंत द्वपं बियाः थः दोष मुक्त जुइमफइगु धायदलि । देय् दुर्घटनाय् लासाः उकीया जिम्मेवार दक्वं दलत जुइगु धयादिसें निषेधात्मक राजनीति शुरु जूगु प्रति च्यूताः प्वंकादिल । वयेकलं मेपिनिगु अस्तित्व स्विकार यानाः न्ह्याः वनेत नं दक्वसितं इनाप यानादिल ।
श्रम क्षेत्रय् अप्वयावंगु अशान्ति प्रति थः तसकं चिन्तित जूगु धयादिसें प्रधानमन्त्री नेपालं श्रम बजारय् पूँजी व श्रम सहयात्री जूगुलिं निगूलिं समन्वय यानाः न्ह्याः वनेमाःगु बिचाः प्वंकादिल । अद्यौगिक क्षेतय् निरन्तर जुयाच्वंगु बन्द, हड्ताल व असुरक्षा थंज्याःगु कारणं स्वदेशी व विदेशी लगानीलय् प्रभाव लाःगु खँ वयेकलं धयादिल । थःगु भारत भ्रमणया झ्वलय् नं अनया पूँजीपतितय्सं नेपालय् लगानीया वातावरा दयेकेत थःत इनाप याःगु खँ प्रधानमन्त्री नेपालं धयादिल ।
वयेकलं अद्यौगिक क्षेत्रया सुरक्षाया निंतिं ब्यागलं हे सुरक्षाबल गठनया गृहकार्य सरकारं न्ह्याकूगु जानकारी नं वहे ज्याझ्वलय् बियादिल । अद्यौगिक लगायत दक्वं क्षेत्रय् शान्ति सुरक्षा कायम यायेत सरकारं विशेष सुरक्षा नीति हःगु दाबी नं प्रधानमन्त्री नेपालं यानादिल ।
