संविधान संशोधन जुसाः आन्दोलन लिताकायेगु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' राष्ट्रपतिया क्षेत्राधिकारया बारे संविधान संशोधन जुसाः आन्दोलन लितकायेगु खँ धयादीगु दु ।
न्यान्हुन्यंकया हङकङ भ्रमण क्वचायेकाः बिहीवाः येँय् लिहांझायादिम्ह प्रचण्डं अन्तर्राष्ट्रिय विमानस्थलय् थःपिनिगु माग सदनय् संकल्प प्रस्तावय् मतदान जुइमाःगु खसां विकल्पया कथं राष्ट्रपतिया क्षेत्राधिकारया बारे संविधान संशोधन जुसाः आन्दोलन लितकायेगु खँ धयादिल । वयेकलं शुक्रवाः निसें माओवादीं घोषणा यानातःगु आन्दोलनया ज्याझ्वः क्वचाइगुलिं मेगू चरणया आन्दोलनया निंतिं सरकार व दलत नाप सहलह यानाः क्वछीगु धयादिल ।
अध्यक्ष प्रचण्डं हङकङय् चिनियाँ कम्युनिष्ट पार्टीया नेतात नाप खँल्हाबंला जूगु धकाः पिहांवःगु बुखँ हल्ला जक जूगु धयादिल । वयेक हङकङय् माओवादीया कार्यकर्तातय्त प्रशिक्षण बीगु ज्याझ्वलय् ब्वति कायेत वंगु आइतवाः उखे पाखे झायादीगु खः ।
