अग्रवालया सभासद पद कायम
नेपाली जनता दलया सभासद विश्वनाथ प्रसाद अग्रवालय यात दल त्वतुगु सम्बन्धी कानुन मदुगुलिं पदं चीकेमदुगु निर्णय कार्यव्यवस्था समितिया बैठकं याःगु दु । जनता दलया पाखें अनुशासन कथं चलेमजूगु धासें अग्रवालयात सभासद पदं चीकेत समितिइ उजुरी तःगु खः ।
बिहीवाः सिंहदरवारय् च्वंगु समितिया बैठकं संविधान विपरीत जुइगुलिं सभासद अग्रवालया पद कायम जुइगु निर्णय याःगु खः । सभासद अग्रवालं छुं न्हूगु दल मचायेकूगु, संसदया नियमित बैठकय् निरन्तर उपस्थित जूगु धासें समितिया बैठकं थंज्याःगु निर्णय याःगु खः ।
जनता दलया समानुपातिक पाखें निर्वाचित जुयादिम्ह अग्रवाल व पार्टी अध्यक्ष हरिचरण साह दथुइ विवाद तच्वयेवं अग्रवालया सभासद पद खारेज यायेत पार्टीं उजुरी दर्ता याःगु खः ।
सभासद अग्रवालयात थ्वस्वयां न्ह्यः पार्टीया अनुशासन विपरीत ज्या याःगु धासें साधारण दुजः समेत मदइगु कथं पार्टीं निष्काशन याःगु खः । संविधानसभाय् निम्ह जक सभासद दुगु जनता दल पाखें निष्काशित अग्रवालं वर्तमान सरकारयात समर्थन यानावयाच्वंगु दुसाः वहे पार्टीया मेम्ह सभासद गायत्री साहं सरकारया विरोध यानाः प्रतिपक्षी च्वनाच्वंगु दु ।
