प्रहरी महानिरीक्षक सहितयात स्पष्टिकरण माग
ज्याकेट काण्डय् अनियमितता जूगु ठहर यासें अख्तियार दुरुपयोग अनुसन्धान आयोगं प्रहरी महानिरीक्षक रमेशचन्द ठकुरी सहित गुम्ह उच्च प्रहरी अधिकारीयात विभागिय कारवाहीया निंतिं स्पष्टिकरण फ्वनेगु निर्णय याःगु दु ।
कारवाहीया निंतिं नायव महानिरीक्षक रमेश बिक्रम शाह, वरिष्ठ उपरीक्षक श्यामबहादु खड्का, उपरीक्षक मनोज न्यौपाने, नायव उपरीक्षक गणेश रेग्मी, नायव उपरीक्षक सिद्धि विक्रम शाह, नायव उपरीक्षक तेजानारायण शर्मा, निरीक्षक सीताराम चापागाई व निरीक्षक शम्भू ढकाल नाप स्पष्टिकरण फ्वनेगु निर्णय याःगु खः ।
अथेहे आयोगं बुधवाः पिथंगु विज्ञप्तिइ ब्यागलं हे कानुनी अस्तित्व व ब्यागलं बजेट विनियोजित जुइगु संस्थायात अनावश्यक हस्तक्षेप यानाः कार्यगत स्वयत्तताय् असर लागु खँ न्ह्यथंसें आवंलिसें अज्याःगु ज्या मयायेत गृहसचिवया ध्यानाकर्षण यायेगु निर्णय याःगु दु ।
अथेहे आयोगं ज्याकेत न्यायेगु ईलय् बोलपत्र लगायतया ज्याय् पालना यायेमाःगु बाध्यात्मक व्यवस्थात पालना मयाःगु, मुल्यांकनय् प्रकृयागत त्रुटी दुगु, छनौट जूगु बोलपत्रदातात नाप सम्झौता हे मयासें चेक ब्यूगु व उगु चेकया ध्यबा फ्रिज जूगुलिं बोलपत्रत रद्द यायेत निर्देशन ब्यूगु दु ।
नापं सार्वजनिक ऐन २०६६ व सार्वजनिक खरिद नियमावली २०६४ समेतया आधारय् प्रहरीया निंतिं माःगु ज्याकेट न्यायेगु सम्बन्धी ज्या याकनं यायेत नं प्रहरी प्रधान ज्याकूयात निर्देशन ब्यूगु दु ।
