स्वंगू दलया बैठक निष्कर्षविहीन
वर्तमान राजनीतिक संकटयात निकास बीत च्वंगु प्रमुख स्वंगू दलया बैठक बुधवाः नं निष्कर्ष विहीन जूगु दु ।
प्रधानमन्त्रीया ज्याकू सिंहदरवारय् च्वंगु बैठकय् ब्वति काःपिं नेतातय्सं निकासया निंतिं न्हूगु तरिकां न्ह्या वनेमाःगु खँ त:गु खसां गज्याःगु तरिका धइगु खँय् धासाः स्पष्ट जुइमफुत । बैठकय् प्रधानमन्त्री माधवकुमार नेपाल, एकीकृत नेकपा (माओवादी)या उपाध्यक्ष डा. बाबुराम भट्टराई, नेपाली कांग्रेसया महामन्त्री विमलेन्द्र निधि लगायत नेतातय्सं ब्वति काःगु खः ।
बैठकय् सत्तारुढ गठबन्धन दलतय्त मान्य जुइ कथं मंकाः संकल्प प्रस्ताव पेश यायेगु विकल्पया कथं सहलह जूगु खः । बैठक लिपा एमाले सचेतक भीम आचार्यं माओवादीं संसदय् पेश याःगु संकल्प प्रस्ताव लितकाया न्हूगु प्रस्तवा कथं माओवादीया माग व सरकारी पक्षया अडानयात दुथ्याकाः न्हूगु प्रस्ताव ह्येगुयात विकल्पया कथं सहलह जूगु कनादिल ।
प्रमुख प्रतिपक्षी दल माओवादीं नागरिक सर्वोच्चताया माग यासें अवरुद्ध यानाच्वंगु संसदया बैठक अन्त्य यायेत दलत नाप सहलह यायेगु निर्णय मंगलवाः च्वंगु मन्त्रिपरिषदया बैठकं निर्णय याःगु खः । मन्त्रिपरिषदया निर्णय कथं मगंलवाः स्वंगू दल दथुइ च्वंगु बैठकय् दलतय्सं थःथःगु पुलांगु हे अडान कायेवं बैठक हानं बुधवाः च्वंगु खः ।
