खाया लाया भाः अझ थहां वन
येँ (सन्ध्या टाइम्स)/ वंगु छुं ई न्ह्यवंनिसें थहां वनाच्वंगु खाया लाया भाः अझ थहां वंगु दु ।
वंगु झिंन्यान्हु न्ह्यः तक २४० तका प्रति किलों मियाच्वंगु खाया ला आः २६० तका थ्यंगु दु ।
थुकिया बारे न्यनेकने यायेगु झ्वलय् खाया ला उत्पादन याइगु भ्याली कोल्ड स्टोरं थःपिंसं होलसेलं प्रति किलो २५० तकां मियाच्वनागु जानकारी बिउगु दु। तर लाया भाः थहां वंगु कारण धाःसा कने चाहे मजू ।
अथे हे बालाजुया चिकेन हटया प्रमुख पशुपति दाहालं धाःसा थम्हं प्रति किलो २३५ तका होलसेल भावं मियाच्वनागु जानकारी बियादीगु दु। वय्कःया कथं लाया भाः थहां वंगु प्रमुख कारण मध्ये छता बजाःया माग कथं थन चल्ला उत्पादन मयाःगुलिं जूगु खँ कनादिसें पर्याप्त मात्राय् खाचा उत्पादन यायेगु खःसा लाया भाः अझ कुहां वयेफइगु खँ कनादीगु दु ।
बजारय् लाया भाः थहां वंगु कारणं व्यापारीतय्सं यानाच्वंगु कार्टेलिङ्ग जकं मखु ला धकाः 'सन्ध्या टाइम्सं' न्यनागु न्ह्यसलय् वय्कलं उकियात स्वीकार यासें खाचा व दाना उत्पादकतय्सं आवश्यकता कथं उत्पादन मयाःगुलिं हे भाः थहां वंगु जानकारी बियादिल। 'आः वयाः भचा खाचा व दाना अप्वः वयाच्वंगु दु' वय्कलं कनादी ।
थुकथं हे खाया अभाव जुयाच्वन धाःसा मोहनिया इलय् अझ भाः थहां वनिगु खँ नां कने चाहे मजूम्ह छम्ह खुद्रा व्यापारीं कनादिल ।
उखे खसिया लाया भाः धाःसा वंगु छुं महिना न्ह्यः निसें यथावत जुयाच्वंगु दु। खसिया ला प्रति किलो ४५० तकां मियाच्वंगु दु। तर मोहनिया इलय् खसिया लाया भाः नं थहां वनेफइगु खँ धाःगु दु ।
