माधव नेपाल नं सरकार भंगया लँय्
एमालेया पुलांम्ह महासचिव माधवकुमार नेपाल नं वर्तमान सरकार भंग यानाः कांग्रेसनाप जानाः न्हूगु सरकार दयेकेगु पक्षय् दुगु खँ एमाले सूत्रं धाःगु दु । थःत राष्ट्रपति दयेकेगु ज्यायात माओवादीं समर्थन मयाःगुलिं वय्कः सरकार भंग यायेगुपाखे न्ह्यानाच्वंगु खँ नं सूत्रं धाःगु दु ।
सूत्रया कथं माधव नेपालं थ्व खँ तप्यंक गनं नं मधाःसां सरकार भंग यायेगु निंतिं धाःसा दुने दुने सकि्रय जुयाच्वंगु दु । उकिया निंतिं वय्कलं महासचिव झलनाथ खनालया कट्टर विरोधी केपी ओलीयात न्ह्यःने तयाः ज्या यानाच्वंगु खँ नं सूत्रं धाःगु दु ।
एमाले महासचिव खनाल पक्षं थ्व खँयात थुइकाः हे माओवादीनाप स्वापू क्वातुकेगु निंतिं माधव नेपालया हे नेतृत्वय् संयन्त्र दयेकूगु खँ नं सूत्रं कंगु दु । थुगु संयन्त्रय् अप्वः धइथें नेपाल पक्षयापिंत हे तःगु खँ नं धाःगु दु ।
उखे झलनाथ खनालं धाःसा वर्तमान सरकार भंग यात धाःसा कम्युनिष्ट आन्दोलनयात हे बांमलाःगु लिच्वः लाइ धकाः सरकार भंग याये मजिउगु खँ धायेगु यानाच्वंगु दु ।
म्हिगः च्वंगु पार्टीया केन्द्रीय बैठकय् झलनाथ पक्षं महा- धिवेशन आयोजक समिति दयेकेगु अडान त्वःतूगुया कारण नं पार्टी दुने विवाद ब्वलनाः उकिया लिच्वः सरकारय् तकं लाइ धकाः हे खः धाःगु दु ।
म्हिगःया बैठकय् आयोजक समिति दयेकेमाःगु पक्षय् १४ अाचलया सचिव लिसॆं प्ररायुसंघ अनेरास्ववियु भूपू विद्यार्थी काउन्सिलया नं समर्थन दुगु खः । महाधिवेशन आयोजक समिति मदयेकूगुलिं झलनाथ पक्षधरयात फाइदा जूगु दावी नं सूत्रया दु । थुकिं नेपाल व ओली पक्षधरत यथास्थितिवादी जूगु जक मखुसें ल्याय्म्हतय्त नेतृत्वय् हये चाहे मजू धइगु नं थुकिं यच्चुक उला बिउगु खँ सूत्रं धाःगु दु ।
