लुम्बिनीइ राष्ट्रपतिया प्रार्थना
येँ (सन्ध्या टाइम्स)/राष्ट्रपति डा. रामवरण यादव थौं लुम्बिनी थ्यंकः झाःगु दु ।
अन थ्यनेवं वय्कलं लुम्बिनीया गुरुयोजना बारे जानकारी कयादीगु खः। उगु इलय् वय्कलं मायादेवी देगः व अशोक स्तम्भया नं अवलोकन यानादीगु खः ।
देशय् शान्तिया निंतिं प्रार्थना यायेत थः लुम्बिनी वयागु खँ कनादिसें वय्कलं देशय् हत्याहिंसा अन्त्य जुइमाःगु बिचाः प्वंकादिल ।
महामानव गौतम बुद्ध जन्म जूगु देशं शान्तिया सन्देश विश्वन्यंकं थ्यंकेमाःगु बिचाः नं वय्कलं प्वंकादिल। वन सम्बन्धी छगू अन्तर्राष्ट्रिय सम्मेलनय् ब्वति कायेत वय्कः म्हिगः पोखरा झाःगु खःसा पोखरां तुं थौं लुम्बिनी थ्यंकः वंगु खः। वय्कः थौं नवलपरासीइ च्वंगु सेनाया व्यारेक निरीक्षण यानाः राजधानी लिहां झाइगु ज्याझ्वः दु ।
