बचे याः वःपिं प्रहरी घेराउ
येँ (सन्ध्या टाइम्स)/ भारतया डाँकातय् प्रतिकार यायेगु झ्वलय् सुनसरीइ निम्ह नेपाःमि सीगु दु। वंगु चान्हय् सुनसरीया राजगञ्ज सिनुवारी गाविसय् भारतया डाँकातय्सं लुटपाट यायेवं उकिया प्रतिकार जुइवं डाँकातय्सं कयेकूगु गोलीं कयाः लालजित सरदार व चन्द्रदेव यादव घटनास्थलय् तुं सीगु खः। मेपिं छुं मनूत घाःपाः नं जूगु दु।
घटना लिपा अन थ्यंकः वंगु प्रहरीया छगः गाडीयात स्थानीय जनतां मि तया बिउगु दुसा उमिसं प्रहरीयात नं घेरे यानातःगु दु। इलय् हे प्रहरी थ्यंकः मवः धासें उमित घेरे याःगु खः। आः स्थानीय जनतां सीडीओं माफी फ्वनेमाःगु, सीपिनि छेँजःयात क्षतिपूर्ति बीमाःगु व सुरक्षाया प्रत्याभूति बीमाःगु माग यानाच्वंगु दु। घटना लिपा सुनसरी तनाव जुयाच्वंगु खँ धाःगु दु ।
उखे कञ्चनपुरय् नं दर्जनौं छेँय् डाँकातय्सं लुटपाट याःगु दु।
