नेप्से थहां वनेगु क्रम जारी
येँ (सन्ध्या टाइम्स)/नेप्से थहां वनेगु क्रम म्हिगः नं जारी हे जुल। कारोबार शुरु जूगुयां झिंन्यागू मिनेट तक स्थिर जुयाच्वंगु नेप्से परिसूचक वयां लिपा बाघौया दुने झण्डै झिगू अंकं तक थहां वनेधुंकूगु खःसा वयां लिपा धाःसा निरन्तर कुहां वल ।
म्हिगःया कारोबारय् नेप्से लिच्वः लाकीगु वाणिज्य बैंक समुहया कारोबारय् खास हे छुं उल्लेख्य हिउपाः मवःसां गुडवील फाइनान्सय् वःगु ३४०/- र्हासया कारणं नेप्से नं कुहां वःगु खनेदत। म्हिगः नं स्टायण्डर्डया ५०/-, ग्लोबलया ४५/- व नेपाल इन्भेष्टमेण्टया शेयरय् ३९/- तका थहां वन। थुकिया लिसें म्हिगः नेप्से १ दशमलव ४४ अंकं थहां वनाः ६२९ दशमलव ८८ अंकय् थ्यन। सेन्सेटिभ शून्य दशमलव ४६ अंकं व फ्लोट शून्य दशमलव १६ अंकं थहां वंगु दु ।
अथे हे वाणिज्य समुहलय् म्हिगः सामान्य सुधार जुयाः ३ दशमलव ३३ अंकं थहां वनाः ६२८ दशमलव ६२ अंकय् थ्यन। छन्हु न्ह्यःया कारोबारय् कुहां वंगु विकास बैंक समुह म्हिगः दकलय् अप्वः ८ दशमलव ३४ अंकं थहां वनाः ६५६ दशमलव ४४ अंकय् थ्यन। जलविद्युत समुह नं शून्य दशमलव ७४ अंकं वृद्धि जुया ८४३ दशमलव ९२ अंकय् थ्यंगु दुसा छन्हु न्ह्यः कुहां वंगु विमा समुह नं म्हिगः २ दशमलव १९ अंकं थहां वनाः ६२९ दशमलव ७७ अंकय् थ्यन ।
मेखे म्हिगः कारोबार जूगु उपसूचक मध्ये फाइनान्स समुह छगू जक कुहां वंगु दु। गुडवील फाइनान्सया शेयरय् भारी रुपं भाः कुहां वयेवं थुगु समुह ३ दशमलव ४८ अंकं कुहां वनाः ६३५ दशमलव २३ अंकय् थ्यन ।
नेप्से म्हिगः कारोबार जूगु शेयर संख्या नं थहां वनाः स्वंगू लाख द्वःछि झिंगुंगू शेयर कित्ता शेयर न्याय-मी जुयाः झिगू करोड न्यय्छगू लाख व ख्वीस्वद्वः तका दांया कारोबार जुल। म्हिगः दकलय् अप्वः नेपाल त्रे्कडिट एण्ड कमर्श बैंकया प्रमोटर शेयर निगू लाख कित्ता शेयर न्याये-मी जुल। थ्व ल्याखं कारोबार जूगु कम्पनीत मध्ये दकलय् अप्वः दांया कारोबार याःगु कम्पनी नं थुगु हे जुल। थुगु कम्पनीं स्वंगू करोड न्हय्प्यंगू लाख व गुद्वः तका दांया कारोबार यात ।
मेखे म्हिगःया कारोबारय् ग्लोबल बैंकं दकलय् अप्वः कमे यायेत ताःलाःगु दुसा गुडवील फाइनान्सं दकलय् अप्वः गुमे याःगु दु ।
