किपुली प्रधानमन्त्रीयात अप्पां क्येकल

त्रिभुवन विश्वविद्यालया दीक्षान्त समारोहलय् ब्वति कायेत किपुली दुगु त्रिवि थ्यंकादिम्ह प्रधानमन्त्री माधवकुमार नेपालयात माओवादी कार्यकर्तातय्सं नाराबाजी यासें अप्पां क्येकूगु दु । प्रधानमन्त्रीं विद्यार्थीतय्त दीक्षित यानाच्वंगु ईलय् दबुली हे प्रदर्शनकारीतय्सं हाकूगु ध्वाँय् क्यनाः अप्पां क्येकूगु खः ।

त्रिविया स्वीप्यक्व:गु दीक्षान्त समारोहलय् प्रधानमन्त्रीं ब्वति काइगुलिं अन सुरक्षा व्यवस्था अत्यन्त कडा यानातःगु खसां समारोह स्थलय् दुहां वयाः माओवादी कार्यकर्तातय्सं विरोध प्रर्दशन याःगु खः । विरोध प्रदर्शन यायेवं प्रहरीं प्रदर्शनकारीतय् लाठीचार्ज याःगु खः ।

त्रिविं विद्यावारिधि, स्नातकोत्तर व स्नातक तह उत्तीर्ण जूपिं ४३५० विद्यार्थीतय्त कुलपति समेत जुयादिम्ह प्रधानमन्त्री नेपालं दीक्षित याकादीगु खः ।