रत्नपार्क मखु आः शंखधर पार्क
नेकपा एमाले येँ जिल्ला समितिं येँया रत्नपार्कय् शंखधर साख्वाःया झ्वाता तयाः उगु पार्कया नां नं शंखधर पार्क तयेत सरकार समक्ष माग याःगु दु । नकतिनि च्वंगु समितिया बैठकं थ्व निर्णय याःगु खः । थुकिया निंतिं सरकारयात ज्ञापनपत्र बीगु निर्णय नं बैठकं याःगु दु ।
लिसें नेपाल संवत् ११२९ न्हूदँया लसताय् थुगुसी नं थीथी रचनात्मक ज्याझ्वः बिचाः गोष्ठी भिंतुना तुच्चा र् याली हिदान आदि ज्याझ्वःत यायेगु निर्णय बैठकं याःगु दु । थुकिया निंतिं पार्टीया येँ जिल्ला सचिव रामेश्वर फुयालया संयोजकत्वय् ५०१ म्ह दुजः दुगु न्हूदँ समारोह समिति नं नीस्वंगु दु ।
उगु हे बैठकं पार्टीया महाधिवेशनय् प्रतिनिधि जुइत व न्हूगु नेतृत्वय् वयेत भूगोलपाखें अनिवार्य रुपं निर्वाचित हे जुयाः वयेमाःगु प्रणाली नालेत नं पार्टीयात इनाप याःगु दु ।
