जनमुक्ति सेनाया आचार संहिता प्रस्तुत

एकीकृत नेकपा (माओवादी)या जनमुक्ति सेनायात नियन्त्रण यायेत व उमिगु रेखदेखया निंतिं सेना समायोजन प्राविधिक समितिं आचारसंहिता व कार्यविधि प्रस्ताव याःगु दु ।

प्राविधिक समितिं समितिया संयोजक नापं प्रधानमन्त्री माधवकुमार नेपालया बालुवाटारय् बुधवाः नापलाना प्रतिवेदन लःल्हाःगु खः । खुगू पृष्ठ ताःहाकःगु प्रस्तावय् माओवादी सेनाया रेखदेख व प्रत्येक शिविरय् उपसचिवस्तरया सरकारी अधिकारीया नेतृत्वय् न्याम्ह निसें न्ह्यम्ह दुजः दुगु संयन्त्र त्येगु खँ न्ह्यथंनातःगु दु ।

लडाकूतय् न्ह्यगू मुख्य व नीछगू सहायक शिविरय् दक्वं स्थायी रुपय् च्वनीगु उगु संयन्त्रय् माओवादीया कमाण्डर, नेपाली सेना व नेपाल प्रहरीया पुलांम्ह अधिकारीत दुजः कथं च्वनीगु प्रस्ताव याःगु दु । अथेहे प्रस्तावय् संयन्त्रं न्हिया न्हिथं प्राविधिक समितियात जनसेनाया गतिविधि, आवश्कता, विदा लगायत विषयलय् जानकरीया याइ ।

आचारसंहिता व कार्यविधिइ न्ह्यथनातः कथं आः शिविरय् माओवादी पार्टीया ध्वाँय् तयेमदइगु जूगु दु । अथेहे प्रत्येक सेनायात उपलब्ध याइगु तलब नं संयन्त्रं स्वइगु प्रस्ताव याःगु दु ।

थुगु प्रस्तावयात सेना समायोजन विशेष समिति व प्राविधिक समितिया मंकाः बैठक लिपाः अन्तिम रुप बीगु जूगु दु । थुकीया निंतिं प्रधानमन्त्री नेपालं बिहीवाः विशेष समिति व प्राविधिक समितिया मंकाः बैठक आह्वान यानादीगु दु ।