पशुपतिइ भारतीय पुजारीयात हे निरन्तरता ब्यू : विदेश सचिव राव
भारतीय विदेश सचिव निरुपमा रावं पशुपतिया पुजारी नियुक्तिया विषय अत्याधिक राजनीतिकरण जूगु टिप्पणी यानादीगु दु । वयेकलं अन भारतीय पूजारीतय् सुरक्षा व निरन्तरताया निंतिं नेपाःया अधिकारीत नाप इनाप नं यानादीगु दु । वयेकलं नेपाली अधिकारीतय्सं भारतीय पुजारीतय्त जूगु दुर्व्यवहार प्रति दुःख प्वंकूगु धयादिसें पुजारीतय्गु सुरक्षाया प्रत्याभुत याइगु विषयलय् थः विश्वस्त जूगु नं धयादिल ।
निन्हुन्यंकया नेपाः भ्रमण सिधेकाः मंगलवाः भारत लिहांझाये न्ह्यः संचारकर्मीतय्त वयेकलं नेपाःया अधिकारीतय्सं थंज्याःगु घटना हानं जुइमबीगु प्रतिबद्धता प्वंकूगु धयादिल । वयेकलं नेपाली नेतात व अधिकारीत नाप पुजारीया विषयलय् खँल्हाबंला जूगु धयादिसें दक्वं पक्ष आवश्यक सुरक्षाया निंतिं गम्भिर जूगु धयादिल ।
सोमवाः भुटान जुया नेपाः झायादिम्ह रावं नेपालय् राष्ट्रपति डा. रामवरण यादव, प्रधानमन्त्री माधवकुमार नेपाल, उपप्रधानमन्त्री विजयकुमार गच्छदार, परराष्ट्रमन्त्री सुजाता कोइराला, गृहमन्त्री भीम रावल, रक्षामन्त्री विद्या भण्डारी नापं कांग्रेस सभापति गिरिजाप्रसाद कोइराला, एमाले अध्यक्ष झलनाथ खनाल, माओवादी उपाध्यक्ष डा. बाबुराम भट्टारई लगायत नेतातय्त नापलानादीगु खः ।
