भारत नाप जूगु सहमति चरणवद्ध रुपं कार्यान्वयन याइगु
प्रधानमन्त्री माधवकुमार नेपाल व नेपाःया भ्रमणय् झायादिम्ह भारतीय विदेश सचिव निरुपमा राव दथुइ प्रधानमन्त्रीया भारत भ्रमणया झ्वलय् जूगु सहमति चरणवद्ध रुपं कार्यान्वयन यायेगु सहमति जूगु दु ।
मंगलवाः प्रधानमन्त्री निवास बालुवाटारय् जूगु खँल्हाबंलाय् वाणिज्य सन्धि तत्काल यायेगु व उकीया निंतिं मन्त्री स्तरीय भ्रमण तय यायेगु सहमति नं जूगु दु । प्रधानमन्त्री नेपालं खँल्हाबंलाया झ्वलय् पञ्चेश्वर परियोजना निर्माण, विद्युतया निंतिं वीरगञ्ज तकया लाइन विस्तार यायेगु प्रस्ताव यानादीगु खः ।
प्रधानमन्त्री नापया खँल्हाबंला लिपा संचारकर्मीत नाप खँल्हानादिसें भारतीय विदेश सचिव रावं प्रधानमन्त्री नापया खँल्हाबंला तसकं फलदायी जूगु प्रतिक्रिया बियादिल ।
खँल्हाबंलाया झ्वलय् सुपुर्दगी सन्धिया पुनरावलोकन, नेपाः भारत सीमा समस्याया बारे नं सहलह जूगु खः । तर विवादित सीमा सम्बन्धी समस्या प्याकेजय् समाधान यायेमाः धकाः प्रधानमन्त्री नेपालं अडान कायेवं थुकी छुं सहमति जुइमफुगु खः ।
विदेश सचिव रावं नेपाःया लिप्पांगु राजनीतिक घटनाक्रम व राजनीतिक दलत दथुइ स्यनावनाच्वंगु स्वापूया बारे च्यूताः नं प्वंकादीगु खः ।
